Monday, March 18, 2024

ချစ်သော ၂၁

ကိုယ့်ဦးခေါင်းပေါ်ထွန်းထားတဲ့ဖယောင်းတိုင်တွေကို မီးမှုတ်ပါ
ကိုယ့်ရင်ခွင်ကို ဓားနဲ့ခွဲပါ
ကိုယ့်အသဲနှလုံးကို မင်းအချစ်ဆုံးသူကို ခွံ့လိုက်ပါ

အပျော်ရွှင်ဆုံးကိတ်မုန့်တလုံးဖြစ်ရတာနဲ့တင်
ကျေနပ်ပျော်ရွှင်ခဲ့ပါတယ်

ကျေးဇူးပါချစ်သူ
မင်းဂြိုလ်တိုင်မှာ အေးချမ်းစေကြောင်း သက်စေ့လောင်းခဲ့တာ
ကိုယ့်မျက်ရည်စစ်စစ်တွေပါ။

နှင်းခါးမိုး

ချစ်သော ၂၀

မင်းတဘဝလုံးနာကျင်ခဲ့ရတာတွေအတွက်
ကိုယ့်မှာဖြေဆေးမရှိပါဘူး၊
မင်းကိုနောက်ထပ်မနာကျင်စေချင်တော့တဲ့
ပန်းကလေးတပွင့်ပဲရှိပါတယ်။

မင်းကပန်ဖို့ငြင်းဆန်ခဲ့ရင်တောင်
သူ့ဝတ်ဆံလေးထဲမှာ အမြဲလုံခြုံအောင်သိမ်းဆည်းပေးသွားမယ့်သူပါ။

သူကိုယ်တိုင်ကတော့
နာကျင်မှုမှာလန်းဆန်းအောင် ပွင့်ဝေတတ်ခဲ့ပါပြီကွယ်။

နှင်းခါးမိုး

ချစ်သော ၂၀၂၃

ပရိုဖိုင်တွေ
အနက်ရောင်ပြောင်းကုန်ကြပြီ
ပိတောက်တွေ
အနီရောင်ဖြစ်ကုန်ပြီ
လိပ်ပြာတွေ
ဘာအရောင်ဖြစ်သွားကြသလဲ၊
တိုင်းပြည်ကြီးကတော့
မှောင်နဲ့မဲမဲ သွေးရွှဲရွှဲ။

မနက်လေးနာရီပဲရှိသေးတယ်
တော်တော်များများနိုးနေကြပြီ
ဒါမှမဟုတ် ငါ့လိုပဲ အခုအထိ မအိပ်နိုင်ကြသေးတာလား
လီနင်ကမေးဘူးတယ်
"ငါတို့ဘာဆက်လုပ်ကြမလဲ" တဲ့

တယောက်ကို တစက္ကန့်နှုန်းနဲ့ အလေးပြုရရင်တောင်
ငါတို့'နေ့တာ'တွေက ရှည်လျားလွန်းရော့မယ်။
အေး နေ့တာရှည်လေ 'ညတာ'က တိုလေပဲ မဟုတ်လား။

နှင်းခါးမိုး

Tuesday, January 23, 2024

မကောင်းဆိုးဝါး

အစွယ်ကြီးလည်းပြူးမနေဘူး၊ အမြီးတွေ လက်တံရှည်ကြီးတွေလည်းမပါဘူး။ မီးဝင်းဝင်းတောက်နေတဲ့ မျက်လုံးလည်းမရှိဘူး။ မိကျောင်းအရေခွံ၊ ခြင်္သေ့လည်ဆံနဲ့ ဝက်ဝံလက်သည်းတွေလည်းမပါဘူး။ အသံနက်ကြီးနဲ့လည်း မအော်ဘူး။ အရပ်အမောင်းကလည်း ၆ထပ်တိုက်လောက်မမြင့်ဘူး။ 

မသိရင် ရုတ်တရက်နာမည်မေ့နေတဲ့ ငယ်သူငယ်ချင်းတယောက်လိုပဲ။ နာမည်ကြားဘူးပြီး အခုမှတွေ့ဖူးတဲ့ ဟိုဘက်ရပ်ကွက်က လူတယောက်လိုပဲ။ အမျိုးတော်မှန်းသိပါရက်နဲ့ အခုမှ ဆွေမျိုးစပ်မိတဲ့ ဝမ်းကွဲတယောက်လိုပဲ။ မရင်းနှီးပေမဲ့ မစိမ်းတဲ့အပြုံးကလည်းပါသေး။ လိုတာထက်ချိုတယ်ပြောရင်တောင် မမှားနိုင်တဲ့အပြောကလည်း ကျလောက်စရာ။ အရင်တုန်းကဒဏ်ရာတွေသာမရှိခဲ့ရင် တွေ့တွေ့ချင်း ကျောပေးပေါင်းမိမဲ့သူတယောက်။

အနုမြူဗုံးက မြို့ဘယ်နှစ်မြို့ကို ဖျက်နိုင်မလဲ။ လူတယောက်က ကမ္ဘာကြီးကိုတောင် မီးလောင်တိုက်သွင်းနိုင်တယ်ဆိုတာ သမိုင်းက သင်ကြားပေးခဲ့တာ ဘယ်နှစ်ခါရှိပြီလဲ။ ဒါပေမဲ့ ငါတို့က စောက်မှတ်မှမရှိပဲ။ 

လူဆိုအရေခွံတခုပဲ။ သူ့အထဲက ဘယ်အကောင်မဆို အချိန်မရွေးထွက်လာနိုင်တယ်။

နှင်းခါးမိုး

Friday, January 12, 2024

မိမိကိုယ်ကို ကောင်ဆယ်လင်းလုပ်ခြင်း

နှင်းဆီမွေ့ရာပေါ်မှာလည်း မျက်ရည်စက်တွေနဲ့
သံဆူးမွေ့ရာပေါ်မှာလည်း အိပ်မက်လှလှတွေနဲ့၊
သေခြင်းတရားနဲ့ချစ်ခြင်းတရားရဲ့အကြားမှာ
ဘုရားအလောင်းကလည်း သူ့ဇာတ်ကြီးဆယ်ဘွဲ့နဲ့သူ
ဒေဝဒတ်ကလည်း သူ့အပေါင်းအပါနဲ့သူ။
ရေပိုက်ခေါင်းကိုဖွင့်လိုက်တော့ သီချင်းသံထွက်လာတယ်
ရေဒီယိုကိုဖွင့်လိုက်တော့ ဖာရုံထဲဝင်သွားတဲ့ ဘုရားလူကြီးထွက်လာတယ်၊
ခင်ဗျားဘာပြောချင်တာလဲဆိုတော့
ဘာမှမပြောချင်တော့ဘူးဆိုတာ ပြောချင်လို့ပါတဲ့
သေလိုက်၊ အခါတထောင်သေလိုက်
ကိုဗစ်ဖြစ်တုန်း ရောသေလိုက်။
နှင်းခါးမိုး
၁၂၊ အောက်တိုဘာ ၂၀၂၀